Na feria ambulante Hyde, gobernada por una intelixencia artificial creada pol doctor Jekyll, un asesinatu ruempe la ilusión del espectáculu. Los detectives qu‘investiguen descubren bien llueu que cada atracción escuende un secretu, y que la feria mesma podría ser el mayor de tolos sospechosos.

Jekyll y Hyde ye un proyectu escénicu del colectivu Nosomoshermanos que parte del clásicu lliterariu de Robert Louis Stevenson pa desenvolver una creación contemporánea híbrida, na que conflúin teatru, danza contemporánea, artes visuales y tecnoloxía en vivo, permitiendo que‘l públicu se somorguie nella dafechu. Nun busca solo adaptar la novela, sinón ampliar les sos resonancies, confrontando‘l so mitu orixinal colos dilemes de la nuestra dómina: la intelixencia artificial, l‘automatización del trabayu, la construcción de la identidá y la disolución de les llendes ente lo real y lo simulao.