Un proyectu de Tania Blanco.

Fe ye una ampliación del proyectu Fierro. Nesti casu contempla la creación d’una nueva serie d’obres qu’investiguen los materiales de la periferia de la industria metalúrxica d’Asturies. En concreto, les zones portuaries más industrializaes, como ye’l Musel de Xixón, la ría d’Avilés, asina como tola zona industrial pentemedies de les dos ciudaes y l’almacén de refractarios d’Arcelor Mittal Sotiello. Llugares d’interés pol tipu de residuu específicu qu’esiste na redolada: el fierro. L’artista interésase por esti material porque ye un elementu químicu metálicu qu’amás de ser un material básicu pal desenvolvimientu industrial, ta presente nel sangre de los mamíferos. Ye’l mineral que-y da la color al sangre tal qu’evidencia la so etimoloxía: del griegu hema=sangre tita=mineral (piedra de sangre). N’Asturies, la estracción y procesamientu d’esti elementu químicu (el más abondosu na corteya terrestre y el más emplegáu na industria) ye responsable de la esistencia d’una “arteria” hiperindustrializada que modifica drásticamente’l paisaxe de la zona dende hai más de 70 años, ente les sedes d’Arcelor Mittal d’Avilés y Xixón.

Nesti casu interesa l’óxidu que s’escapa de la industria y que pinta de colorao’l paisaxe de la contorna. La mirada de Tania concibe esti fierro como un elementu plásticu, como un tinte, un elementu más que convive col paisaxe natural, de contrastes verdes y coloraos. Retomando una tema constante na so obra, l’artista interésase tamién nes pequenes ayalgues ferruñoses que podemos atopar nestes zones y que faen evidente la entrada nuna nueva dómina, l’antropocenu, que consolídase y fáise visible nestos llugares nos que la llinia ente l’espaciu natural y l’industrial entama a esborriase.