Circuitu d’artes escéniques

Les “farses americanes” de Blanco Amor son ún de los filones más prometedores de la dramaturxa de preguerra, con un desenvolvimientu que quedó tarazáu al producise la diáspora de los intelectuales depués de la derrota republicana na guerra civil. Referímonos al teatru pa títeres que tuvo nesti tiempu cultivadores bien destacaos: Valle-Inclan, García Lorca, Arconada, Alberti.

El “teatru pa títeres” apaez como una de les víes de recuperación de les “señes d’identidá” polos dramaturgos mozos de la época. Enfrentaos al teatru comercial al usu, atopen nel “teatru pa títeres” una base doble: d’un llau, l’entroncamientu col teatru clásicu, d’otru, la busca d’un “teatru popular”, col usu de temes y formes tradicionales.

Estes “farses pa títeres”, concebíes de mano pa ser representaes por moñecos, pueden representase tamién por actores y actrices, pero teniendo siempre presente qu’actitúes, voces, xestos y ecos; too, tien que sacase de madre, esaxerase hasta llegar a l’absoluta vida esperpéntica del títere.

Realidá y fantasía son dos palabres uníes estrechamente nel “teatru de títeres” y realidá y fantasía son dos palabres que nos acompañen a transitar pela representación d’estes farses. Palabres que nos averen una tradición española pervieya y al humor qu’acompaña esta forma teatral.

Comicidá y enfrentamientu al teatru comercial foi’l motivu que llevó a Blanco Amor, y a cuasi tolos sos compañeros de xeneración a escribir esti tipu de “farses” y ye tamién el motivu que nos emburria a nosotros a representales, un sieglu más tarde, como enfrentamientu claru al teatru comercial del nuestru tiempu.