Un proyectu de Tania Blanco.

El títulu “Az- zulay” surde de la palabra d’orixe árabe que da llugar a la palabra "azulexu" actual y que significa “piedra pulía pequena”. L’artista afonda con esta propuesta na llinia de trabayu qu’empecipiara con “Ayalga”, onde yá convidaba a reflexonar sobre la xestión de residuos y les relaciones ente la naturaleza, la degradación ambiental y los espacios de creatividá qu’ábrense al analizar y actuar sobre estes cuestiones.

El proyectu “Az- zulay”, comisariáu por Salim Maya, inclúi la creación d’una nueva serie d’obres qu’investiguen los materiales cerámicos de construcción que lleguen de manera residual a les costes de distintos puntos de la península ibérica (ente ellos Granada y Asturies). Recoyendo eses “piedres pulíes pequenes”, Tania dirixe la so mirada al residuu p’atopar ayalgues ente los restos que lleguen a les costes de distintos puntos de la península ibérica. Estos residuos cerámicos, tresformaos pola naturaleza al traviés de la erosión ambiental, son reciclaos y reinterpretaos pola artista, que los convierte en material pal so arte, convidándonos a reflexonar con ella sobre la insostenibilidá de la dinámica de crecimientu y l’impactu medioambiental del Antropocenu.