Hai yá casi 50 años desque dos ventiañeros de L’Entregu, Jesús Pedro Suárez y Manolo Blanco Peñayos, asociáronse pa formar Nuberu.

La presentación del so primer discu Asturies, ayeri y güei, que yá en 1978 integraba con normalidá la gaita de Manolo Quirós, asitió al grupu como un referente cultural en toa Asturies. Temes como Dame tira, Aida Lafuente o Lliberar l’amor convirtiéronse automáticamente n’himnos que punxeron voz a la nueva sensibilidá social y ideolóxica nun momentu nel que s’aldericaba con entusiasmu’l papel d’Asturies na nueva España democrática. Esti primer discu principia una trayectoria cargada de música reivindicativa y copromisu identitariu que caltuvo a la banda como referente cultural interxeneracional mientres décades. La so vixencia caltúvose inclusive cuando trenta años más tarde, nel 2008, el grupu decidió poner fin a un percorríu artísticu enllenu reconocimientos, de proyectos paralelos y realcuentros pero, sobremanera, de rotundu ésitu popular, con una despidida per tolo alto.

Tres d’una llarga ausencia que caltuvo en fierros a los sos siguidores y a la crítica musical, nel 2024 Nuberu vuelve pa quedase. Pos si’l ciclu vital de toa una xeneración foi pesllándose, non asina’l de los sos componentes, que sigue activu y con esa visión, ampliada y crítica, convídanos a reflexonar sobre aquella historia y esti presente. Porque “la Historia nun ruempe”: espúrrese o enánchase, anuévase, adáptase y… tresfórmase.