El VIII Festival Nel Amaro de Teatru Profesional en llingua asturiana que promueve la Conseyería de Cultura, Política Llingüística y Deporte arranca’l 27 de setiembre. Nel festival teatral van representase les cuatro obres finalistes qu’opten al premiu del mesmu nome, seleccionaes pol  xuráu nuna primer fase celebrada nel mes de xunu.

El premiu Nel Amaro ta convocáu por Cultura nel contestu de los premios lliterarios y artísticos en llingua asturiana y eonaviegu col oxetivu de fomentar la creación nes llingües propies d’Asturias. A él pueden concurrir empreses del sector cultural dedicaes a la producción y representación d’espectáculos teatrales.

El xuráu, integráu por especialistes en teatru y llingua asturiana y presidíu pol director xeneral de Normalización Llingüística, Antón García, seleccionó na primer reunión los trabayos siguientes pa la so representación nel VIII Festival “Nel Amaro” nes feches siguientes: 

•    Amanda y les castañes máxiques, d’Ambigú Media Broadcast (27 de setiembre, 18.30 hores

•    Perendi, de La Compañía del Alba (4 d’ochobre, 20.00 hores)

•    Gasolina con capullos, d’Higiénico Papel Teatro (11 d’ochobre, 20.00 hores)

•    Formigues, d’Elektra Fiktion (18 d’ochobre, 18.30 hores)

Amás, esti añu’l públicu va tener ocasión de volver a disfrutar de la obra ganadora na edición anterior de 2023, El gorrumbu, de Saltantes Teatro, que va poner el ramu al festival el día 25 d’ochobre a les 18.30 hores. 

Les representaciones van facese nel Teatru Filarmónica d’Uviéu con entrada llibre y gratuita hasta completar aforu. Toles funciones que comiencen a les 18.30 hores son aptes pa toles edaes, puesto que tán dirixíes a un públicu familiar. Nel casu de les obres qu’empiecen a las 20.00 tán enfocaes a públicu adulto. 

El Premiu , dotáu con 6.000 euros, convócase col fin de consolidar, arriquecer y prestixar la llingua asturiana y l’eonaviegu nel ámbitu del arte dramáticu. Amás, el Principáu promueve la representación de la obra pela xeografía asturiana al través del programa Autores nel Camín. 

El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral en llingua asturiana. Nel Amaro foi, amás, l’autor al que se dedicó la edición de la Selmana de Lletres Asturianes en 2021.