Remiendos ye una instalación d’una serie d’oxetos de dellos materiales (teles, cerámiques, madera o metales) remendaos baxo’l discursu de lo guapo de lo iguao y del procesu creativu de la prollongación de la vida útil d’un oxetu. Oxetos como niciu del nuestru pasu pela vida, atesoradores de les nuestres buelgues.

El proyectu desenvuelve’l conceptu de “echar un remiendu” como procesu sanador na solución d’un problema o l’iguamientu d’un dañu. Y esi discursu de lo guapo no iguao vese fortalecíu col usu del oru nos materiales amestaos, tal como se fai nel procesu d’orixe xaponés del Kintsukuroi: la técnica d’iguar con llaca d’oru los desperfectos de cualquier oxetu, un abrazu estéticu que nos reconcilia colos errores aguapándolos.