La ópera de Mozart ye ún de los monumentos del arte occidental. Estrenóse nel Hofburgtheater de Viena en 1786. El llibretu de Lorenzo Da Ponte básase na obra teatral de Beaumarchais La folle journée, ou Le Mariage de Figaro (1778). La obra del dramaturgu francés prohibióse en Viena porque atacaba la moral de l´aristocracia. Sicasí, Da Ponte consiguió´l permisu del emperador José II pa escribir el llibretu. El poeta y llibretista italianu evitó los momentos más conflictivos, pero caltuvo los aspectos satíricos.

Dende´l puntu de vista musical, Mozart llogra un equilibriu formal almirable ente´l tempo dramáticu y el musical. Les bodes de Fígaro constituye una pieza maestra de caracterización, d´inxeniu vivu y fondura emocional. Sicasí, la estrena en Viena, a pesar de les intrigues, supunxo un trunfu relativu pal compositor, yá que l´audacia de les situaciones y la orixinalidá de la música nun foron les más amañoses pal gustu d´un públicu frívolo.