El barberu de Sevilla ta considerao pol públicu y pola crítica como ún de los cumes del arte cómicu de Rossini y de tola ópera bufa. El so éxitu nun reside namás na calidá musical altísima de la ópera, sinón nel nivel escelente del testu orixinal de Beaumarchais, que’l llibretu de Sterbini -cosa raro na dómina- conserva intactu sustancialmente.

La ópera estrenóse nel Teatru Argentina de Roma en 1816. "Anque aprovechó dalgunos modelos presentes en Les bodes de Fígaro, Rossini aplicólos a la realidá social nueva del home surdíu de la Revolución francesa. L’espíritu de la burguesía apaez retratáu vívidamente n’El barberu de Sevilla. Los personaxes de Beaumarchais garren un ritmu nuevu, una psicoloxía tovía más terrena y realista: son l’espeyu de la cotidianidá". El públicu decimonónico esixía tintes xubíos, y los intérpretes alloñábense cada vez más de la tradición del bel canto, pa tentar efectos musicales y teatrales ayenos dafechu al espíritu llixeru y irónicu qu’anima la ópera. La edición crítica de la obra al cargu d’Alberto Zedda recuperó la lletra y l’espíritu orixinal de la partitura.