En Don Ramón María del Valle-Inclán dase un doble retratu, el del retratista y el del retratáu. Viaxando a la vida, la obra y l´alma de Valle Inclán, podemos observar les sos ferramientes d´análisis, los sos instrumentos de disección, el so canon estéticu. Dase asina´l milagru de la suma estilística y vital de dos creadores lliterarios esenciales pa entender una bona parte de les vanguardies españoles del sieglu XX. Foren munches les aproximaciones ditirámbiques a la figura de Valle, esperpéntiques inclusive, pa facer honor al xéneru por él bautizáu. La obra convídanos a percorrer otru camín, más averáu a la intimidá, a la realidá cotidiana, a la valoración d´unos principios éticos delles veces tapecíos pola distorsión. Convídanos, en fin, a conocer más fondamente los mecanismos creadores de Valle, el so compromisu irreductible col so posicionamientu éticu nel mundu y cómo too ello xenera una de les obres cimeres de la nuestra lliteratura. Xavier Albertí.