Un proyectu de Pablo Casanueva.

Ente los años 2012 y 2015 l’artista percorría’l so conceyu, Ribeseya, tratando de topar rasgos comunes (históricos, llingüísticos, identitarios) y caltenelos visualmente. Yera la fotografía la puerte d’entrada a esos alcuentros que-y permitieron sentir, y rexistrar dalgunes veces, la memoria d’una xeneración ente dos mundos. Faló con esta xente y cuntáron-y la so vida con pallabres vieyes. Dexáronlu conocer los sos archivos fotográficos, los sos llugares y les sos xeres. Retratólos nel so espaciu, ensin intervenir, ensin illuminar. Una búsqueda documental, un retratu honráu y xustu. Per otru llau, una mirada propia y atenta a les formes. Faló-yos na so llingua. Faló con elles ensin procuru investigador, primando la naturalidá y la cercanía na conversación. 

Torna agora a estes imáxenes pa da-yos nueva forma ya incorporar non solo la fotografía elexida, sinón les que tamién formaron parte del procesu fotográficu del retratu. Nun edita les pruebes: el disparu orixinal de la cámara. Trata con ello de topar motivos visuales recurrentes y aportar movimientu, una suerte de cinematografía. Nesti procesu de revisión alcuentra tamién dalgunes grabaciones visuales y sonores. Nes primeres dilata’l tiempu y quíta-yos el color, como un suañu nel que les llabores y la xente yá son pantasmes. Nes segundes, les voces amontónense na memoria y dexen, de xemes en cuando, pallabres qu’evoquen y construyen el pasáu (la guerra, la represión, el trabayu, la historia). El testimoniu d’ecos de vides cada vez más llonxanes. Nel procesu creativu dase cuenta que siempres torna a estes imáxenes y rellatos que foron, y entovía son, pegoyu suyu y de nueso.