Circuitu de música

La serva padrona (1733) de Giovanni Battista Pergolesi ye un intermezzo, en dos partes, con llibretu n’italianu de Gennaro Antonio Federico, a partir de la obra de teatru de Jacopo Angello Neli.

Considérase la primer obra maestra del xéneru cómicu (ópera bufa) y cunta la historia de la criada Serpina y el so patrón Uberto, un solterón ricu y de mal xeniu. Cuando ésti anuncia’l so determín de casase, Serpina asegura que va ser ella quien se va convertir na muyer d’Uberto y nel ama dafechu de la casa. Depués d’una montonera d’enriedos y un ultimátum, Uberto va escoyer casase con ella, convirtiéndose asina la sirvienta en patrona.