Manual de la siega, de Samuel Fernandi, súmase tamién a la llista depués de llograr el Premiu Curtiumetraxes Llaboral Cinemateca nel Festival Internacional de Cine de Xixón

Un total de 24 trabayos presentáronse a la última convocatoria del programa de curtios de Llaboral Cinemateca

02/12/2021.- El catálogu Llaboral Cinemateca Curtios incorpora cinco curtiumetraxes nuevos realizaos por cineastes asturianos pa la so promoción y distribución en certámenes cinematográficos nacionales y internacionales. Ye'l casu d'Europa, de Lucas del Fresno; L´Osbcurité, de Carlos Navarro y Iván Martínez, y les óperes primes  Va a ser mi memoria siempre, de Marina Munárriz y Fita, de Diego Flórez.

Amás, el curtiu Manual de la siega, que dirixe Samuel Fernandi, súmase a la llista depués de llograr el Premiu Curtiumetraxes Llaboral Cinemateca nesta última edición del Festival Internacional de Cine de Xixón (FICX), na que compitió na sección oficial de curtios. A la última convocatoria, la más numberosa dende la puesta en marcha del programa, presentáronse un total de 24 trabayos.

Estos cinco curtios escoyíos, amás de los otros 19 presentaos, van pasar a formar parte del Archivu de curtiumetraxes asturianos que Llaboral Cinemateca pon a disposición de programadores, investigadores, profesionales y aficionaos, valiendo asina d'escaparate del talentu creativu asturianu y promoviendo’l desenvolvimientu del sector audiovisual del Principáu. Amás, tamién pasen a formar parte del Archivu del Curtiumetraxe Español qu'ellabora la Coordinadora del Curtiumetraxe Español.

Europa, de Lucas del Fresno

Pedro, un home asturianu que vive en Suíza y trabaya nuna esplotación ganadera, vive solu, cuasi aisláu. El so hermanu píde-y pel teléfonu que vuelva a casa, porque la so madre ta enferma, pero primero de marchar Pedro tien que llevar una vaca al mataderu.

Sobre esta premisa, Europa construye una historia sobre la distancia, nuna dómina na que'l mundu ye cada vez más pequeñu y el desarraigu ye cada vez más poderosu, llevándonos lloñe de los nuestros raigaños. Con tonu secu, y una puesta n'escena sólida, Del Fresno firma un trabayu emocionante y contemporaneu.

L'obscurité, de Carlos Navarro y Iván Martínez

Cola mirada puesta, a manera de cita y homenaxe, en La Jetée de Chris Marker, Carlos Navarro y Iván Martínez construyen una crónica de los díes de la pandemia a partir de fotografíes d'amaneceres, atapeceres y nueches, fuxendo de l'antoloxía de l'aburrición pa construyir una ensoñación cuasi distópica.

Va a ser mi memoria siempre, de Marina Munárriz

Nel so primer trabayu como directora, Marina Munárriz tiende pontes ente la historia íntima y la historia social. El retratu de la so güela, fechu a base d'alcordances, fragmentos, fotografíes y revisitaciones, estiéndese ensin sentimentalismu escontra'l testimoniu de la crisis y degradación de la cuenca minera (d'Asturies). De dambes queda la proyección d'una imaxe mítica, que non mitolóxica.

Fita, de Diego Florez

Un monte. Nieve. Un paisaxe. Borrina. Un nome: Fita. El protagonista busca a la so perra perdida, y ye una busca que, adulces, vuélvese agónica y desesperada, seique porque'l perdíu seya él mesmu.

Diego Flores debuta con un curtiumetraxe minimalista, cuasi astractu, pero marcáu por un misteriu interior que nos lleva al existencialismu, onde conxuga con precisión unos elementos llimitaos, pero abondos.

Manual de siega, de Samuel Fernandi

Samuel Fernandi da un xiru al respective del so trabayu anterior, l'animación El Diañu, y introduzse nel xéneru de la non ficción con un curtiumetraxe emotivu onde vuelve afitase na tradición y na familia. Filma a los sos güelos na temporada de la siega, superando les llendes del cine etnográficu y el componente didácticu qu'anuncia nel títulu pa dar forma a un homenaxe a los sos antepasaos y a una elexía sobre l’esvanecimientu del mundu rural.

Manual de la siega recibió'l Premiu FICX Pro/LAB - Asturies Paraísu Natural Filme Commission nel Festival Internacional de Cine de Xixón 2020 y foi escoyíu na convocatoria del 2021 del programa de patrocinios de cineastes asturianos de Llaboral Cinemateca, que promueve la Conseyería de Cultura, Política Llingüística y Turismu.

El realizador Ángel Santos Touza, director de los llargumetraxes Dos fragmentos/Eva y Las altas presiones (Premiu «Nuevas Olas» al Meyor Filme Européu nel Festival de Sevilla) y dellos curtios —ente ellos Así vendrá la noche, col que compitió na Sección Oficial del 59 FICX—, formó parte de la Comisión de Valoración d'esta convocatoria, que tamién integró Isona Admetlla, socióloga y xestora cultural que combina'l so trabayu d’office manager nel Berlinale-World Cinema Fund cola so actividá docente na Universidá de Barcelona, la Universitat Oberta de Catalunya y otres instituciones.

Completó'l xuráu Millán Vázquez, sociu fundador d'Axencia Freak de distribución de cine independiente y responsable d'adquisiciones y ventes pa l'axencia de ventes internacionales Feelsales. Impartió seminarios y conferencies sobre distribución de curtiumetraxes y marketing y punxo en marcha les plataformes de distribución online de cine Feelmakers.com y Uptofest.com, amás de participar na fundación d'instituciones y asociaciones del sector audiovisual, como la Extremadura Film Commission, la Coordinadora del Curtiumetraxe Español y la Rede Europea de Distribuidores de Curtiumetraxes Short Circuit.

Llaboral Cinemateca Curtios ye'l proyectu de distribución de curtiumetraxes asturianos de Llaboral Cinemateca, l'espaciu dedicáu al sector creativu cinematográficu y audiovisual promovíu pola Conseyería de Cultura, Política Llingüística y Turismu, al traviés de Llaboral Ciudá de la Cultura.