La maxa del cine mudu garra cuerpu d’una manera única en cada proyección con música en directo. En formatu de pianu solu, César adapta la instrumentación a cada película y escena, emplegando distintos teclaos, percusiones y efectos. Con un enfoque basáu na improvisación y la composición en directo, la so música adáptase a l’acción, marcando mesmo la sicoloxía de los personaxes que la so fisicalidá y tolos detalles de les escenes, creando asina una esperiencia irrepetible.

La variedá de filmes inclúi les obres más reconocíes de los mayestros del cine mudu como Charles Chaplin, Buster Keaton, Harold Lloyd, F.W. Murnau, Joseph von Sternberg o Alfred Hitchcock, ente otros; abarcando xéneros tan variaos como la comedia, el misteriu, el surrealismu o les primeres películes de gangsters.