Corquiéu nació en Ribesella nel año 1997 y a lo llargo d’estos casi 30 años consolidóse como un referente dientro de la escena folk asturiana y ún de los directos más potentes a nivel européu.

El grupu tien percorrío los escenarios de los principales festivales de folk europeos, repitiendo participación en dellos casos a lo llargo de los años y incluyendo’l Celtic Connections de Glasgow y el Shetland Folk Festival (Escocia), Andar per Música (Italia), Tonder Folk Festival (Dinamarca) o l’incomparable Festival Intercélticu de Lorient (Bretaña francesa), ente munchos otros qu’inclúin países como Portugal, Bélxica, Holanda, Hungría, República Checa, Eslovaquia, Luxemburgu y Alemaña. Y si Corquiéu percorrió mundu, tamién tien recibío reconocimientos n’Asturias, ganando dellos Premios AMAS de la música asturiana: al meyor discu folk con Suaña y Salia, meyor canción folk con Ribeseyana, Bratislava y Murniu cantar; amás d’a los méritos individuales de varios de los sos miembros col AMAS de "otros instrumentos". Al marxe de los dos trabayos premiaos, tienen otros dos discos publicaos: La Barquera y, de recién, El Zanjón, el so caberu trabayu discográficu, un EP llanzáu en xunu de 2025.

Corquiéu fai música de composición onde se mecen les balaes vocales colos ritmos vivos y rápidos pa construyir sets instrumentales sólidos y mui enérxicos con un directu dinámicu y variáu, respetando siempres los patrones de la música tradicional asturiana.