Herbamora ye’l grupu que revolucionó la pandereta asturiana. La formación nació en 2003, cuando seis muyeres percusionistes y cantantes vinculaes a la cultura tradicional xuniéronse con un oxetivu: dar un aire nuevu al mundu de la pandereta y sacara de los estereotipos nos que taba arrequexada.

Asina ye como s’estrenaron con ¡Sali, L.luna!, un trabayu con cantares que van dende la fusión col jazz, el funk y el rock hasta la tradición nel so estáu más puru. Con él ganaron el Premiu al Meyor Cantar en Llingua Asturiana y algamaron nominaciones nos Premios AMAS. En 2013, espublizaron N’Acústicu, un EP muncho más desnudu musicalmente, pero compuestu con abondu curiáu y sensibilidá. En 2024, el so tercer trabayu 286 Llunes demostraba por qué siguen siendo les revolucionaries de la pandereta, trayendo al presente lo que cantaban les güeles asturianes, destacando la importancia del amor propio, l’empoderamientu femenín y el poder de la sororidá nuna sociedá individualista y heteropatriarcal.

Pagó la pena la espera, porque, como dicen les mesmes Herbamora:
"Volvemos más segures y con más fuercia. Foron once años de silenciu pa volver faciendo ruíu de la meyor forma que sabemos: tocando y cantando".