Un proyectu de Ramón Isidoro Pérez Martínez

L’artista vuelca nesti casu la mirada sobre ún de los elementos astractos fundamentales del so trabayu, xunta la música: los llibros, los sos llibros, la so biblioteca, les biblioteques. Nuna propuesta d’ecos "borgianos", materialízase l’actu de compartir esi llaberintu lliterariu onde entra toa inspiración, y onde toos, artistes o no, podemos perdenos o reflexanos.

La puesta n’escena inclúi una selección d’obres derivaes, heriedes o inspiraes nesi universu lliterariu particular. L’artista tamién amuesa un mural de referencies, una mena de "tablilles de memoria" con cites de los sos escritores seleccionaos xunta estractos de testu representativos. Pero, amás, l’oxetu simbólicu de la biblioteca, el paisaxe físicu, tamién ta presente na muestra nuna versión plástica con una escultura o relieve onde los llombos de los llibros garren cuerpu nos estantes, anónimos, porque yá son símbolu. Ye una pieza qu’asitia’l llaberintu nel so contestu y al creador, nel so llaberintu.