Una muyer de pueblu prepara l’amagüestu con ilusión cuando ye atayada polos berros desaxeraos d’una moza de ciudá. La muyer nun sal del so plasmu al descubrir que la moza nun sabe malpenes nada sobre la cultura rural y de los nuesos antepasaos. La moza, bien moderna ella, quier facese la llista, lo que va dar llugar a situaciones divertíes. Pero la muyer tien muncho que dicir y va amosar la importancia de les muyeres nel mediu rural calteniendo, ente otres munches coses, les tradiciones y el desarrollu.

Entama la seronda fala del traxe tradicional, de mitoloxía, de cosadielles, de tradiciones y cultura asturiana. La muyer fala n’amestao, la moza en castellán y cola so conversación descubrimos que nin la muyer ye tan tradicional nin la moza tan moderna. La muyer curia y intenta caltener tradiciones y sabiduría popular pero eso nun-y torga vivir nos tiempos actuales, manexar tecnoloxía y tener una mente abierta.