¡Da gloria veles! Como acabante llegar d’otru tiempu. Fálense, gláyense y nun se miren, porque caúna va a lo suyo. Doña Carmen decreta y determina como un águila imperial, rezando y mentando a Dios too siguío, arrenegando ente rezos y plegaries. Alejandra lleva la carga, cuantayá que decidió nun pensar, el so oxetivu ye’l trabayu, y va selo hasta’l día que Dios quiera (el Dios de la so señora, claro) anque yá que falten munchos años pa que quiera, emburria decidida la siella al ritmu vivu del pasudoble español. Y énte dambes, el mundu.

Un espectáculu teatral qu’esplora, con momentos de rises y de gran emoción, la fonda soledá de les persones mayores. Al traviés d’hestories entetexíes, amuésase la llucha silenciosa y la necesidá de compañía, recordándonos la importancia de la empatía y la conexón humana en toles etapes de la vida.