La Conseyería de Cultura, Política Llingüística y Deporte entamó’l Festival d’Arquitectura, Cultura y Territoriu ECOS. Trátase del primer festival d’arte efímeru que se desenvuelve dafechu nel patrimoniu industrial asturianu. L’eventu va empezar esti 3 d’ochobre cola inauguración oficial y una programación novedosa que va acullá de l’arquitectura, poniendo’l trabayu de creadores locales como un reflexu nítidu de la cultura minera.

D’esta manera, Cultura muestra’l so compromisu p’asitiar la cultura y l’arquitectura como ferramientes clave na revitalización de los valles mineros y el caltenimientu del nuestru patrimoniu, al tiempu que val como recursu turísticu de los conceyos de la contorna. Precisamente, esti festival caltién una collaboración cola Feria de Turismu Mineru y Industrial (FETUMI), onde les y los arquitectos del festival ECOS van presentar los sos trabayos.

El festival ECOS va cuntar con siete instalaciones efímeres d’arquitectura realizaes por equipos creativos de sonadía reconocida, amás de videomapping, xornaes de puertes abiertes, meses redondes, simposios, talleres, conciertos y visites guiaes.

Con esti festival, el Gobiernu d’Asturies quier dar a conocer los valores culturales del territoriu asturianu a la sociedá, convidando al públicu a visitalu al traviés de la realización de les instalaciones arquitectóniques de calter efímeru en sitios emblemáticos vinculaos a la minería: los pozos San Luis y El Fondón (Llangréu), El Sotón (SMRA), Santa Bárbara, San José y Espinos (Mieres). L’actividá cultural tamién va desenvolvese nos conceyos d’Ayer y Llaviana.

A lo llargo de diez díes dende la inauguración, prevista pal 3 d’ochobre del 2024, estos van ser los escenarios abiertos al públicu. La iniciativa entámase alredor de les instalaciones arquitectóniques, que se diseñen d’alcuerdu cola temática principal, los ECOS.

Los montaxes efímeros van ser los elementos conductores d’unos percorríos propuestos al traviés del territoriu asturianu, caún d’ellos en rellación directa con un elementu patrimonial destacáu del paisaxe industrial: los pozos. Estos van ser los equipos creativos, la obra y l’emplazamientu onde van llevase a cabu:

• Space Popular: Furacu. The Hole Story (Pozu San José)
• Estar Estudio: Reonda (Pozu Santa Bárbara)
• Lófacil y Salomé Wackernagel: El Cuadro Blanco y Rurápolis Summerschool (Pozu Espinos)
• ARKUOS: Saurín Lagniam (Saurín el de Langreo) (Pozu Fondón)