La esposición ta constituyida por una selección d´obres procedentes de la colección del Muséu de Belles Artes d´Asturies.

Les 60 obres que componen la muestra ufierten una visión amplia y diversa de la producción d´Amador, yá que tán realizaes coles disciplines artístiques diverses que cultivó l´artista: escultures, maquetes, pintures y colaxs. Les obres espuestes enmárquense cronolóxicamente ente les décades de 1960 y 1990, cubriendo gran parte de la carrera del artista.

Amador Rodríguez (Ceuta, 1926-Madrid, 2001) realizó nel añu 1991 la so primer esposición nel Muséu Antón que caltién la so buelga na escultura “Cubo vacío” instalada nos xardinos del muséu dende l´añu 1994.

Amador, nació en Ceuta, pasó la so neñez en Cangas del Narcea, pa depués dir pa Madrid, onde asitió la so vida profesional, anque siempre caltuvo un estrechu llazu con Asturies.

Foi un artista autodidacta, empecipió na pintura y foi a lo primero de los años sesenta cuando dio los primeros pasos na escultura.
La obra d´Amador, astracta, xeométrica, racional y constructiva, realízase en función d´operaciones de cálculu o progresiones matemátiques. Les sos obres manifestaren la so obsesión poles formes xeométriques.