L’alcuentru viniente del Ciclu Palabra va tar protagonizáu pol periodista y comunicador Xavier Sardà, que va facer un percorríu pela so trayectoria nel ámbitu televisivu y radiofónicu, onde la conversación, el diálogu y el discutiniu valieron pa tratar d’atopar esplicaciones pa la vida actual.

Sardà ye llicenciáu en Ciencies de la Información pola Universidá Autónoma de Barcelona. Depués d’empezar como cronista musical en dellos periódicos como Catalunya Express, Avui, El Noticiero Universal o Mundo Diario, con 19 años llogró una beca en Radio Nacional d’España en Barcelona. Ellí creó’l personaxe del Sr. Casamajor, el güelu dacuando cascarrabies, pero con sabiduría abondo, que facía’l papel d’oyente de Ràdio 4, a onde llamaba pa cafiar y pa dar la so opinión nos programes onde participaba’l so creador «secretu», Xavier Sardá.