Detrás de Verde, la payasa, ta Vanesa y cuando Vanesa yera una neña, quería ser munches coses: cantante, baillarina, madre, periodista de guerra, escritora… ¡artista! Pero siempre-y dicíen “yes demasiao menuda pa la tele”, “eso ye mui peligroso”, “una moza nun pue viaxar sola”. Y la madre “estudia dalgo pa trabayar nun bancu, cola to oficina, calentina. Les tos vacaciones pagues, el to horariu d’ocho a tres…”.

Poco a poco escaeció los sos suaños, convirtiéndose no que toos queríen que fore. Mentes lo escaecía, nel pechu medraba una presión. Hasta qu’un día, lleéndo-y cuentos a la sobrina, atopóse col llibru Cuando las niñas vuelan alto y descubrió que tenía los zapatos enllenos de piedres que-y quitaben de volar.