La Tarrancha nació n’Asturies nel añu 2003 cola idea de facer música d’influencia xamaicana, pero safándose de purismos y intentando beber d’otres influencies. El so soníu foi evolucionando colos años hasta’l momentu d’atopar una personalidá propia.

Actualmente, la so música parte del ska-reggae pa mecese con tolo que se-yos ponga per delantre: soníos asturianos, balcánicos, rusos, llatinos... funk, swing, pachanga... Pura fusión, o como ellos dicen, “mecigayu ska”. Con unes lletres n’asturianu que fuxen del panfletismu característicu de munches bandes reivindicatives, busquen -ensin escaecer el mensaxe social- provocar reflexón y diversión al traviés del humor y de la ironía.

Tienen cinco discos publicaos, tuvieron dos veces nominaos al Premiu al Meyor Cantar en Llingua Asturiana y actualmente atópense presentando’l so últimu trabayu, Baillando con llokes.