Asturies cunta con un ampliu y variáu patrimoniu cultural, integráu por miles de bienes materiales ya inmateriales que conformen la identidá de la comunidá y configuren la so peculiar aportación a la historia de la Humanidá. Trés conxuntos patrimoniales d´Asturies formen parte de la Llista del Patrimoniu Mundial: l´arquitectura prerrománica de la dómina de la monarquía asturiana; delles cueves con arte rupestre paleolíticu como Tito Bustillo, San Román de Candamu y El Pindal; y el Camín de Santiago, itinerariu cultural que surdió n´Asturies nes primeres décades iniciales del sieglu X, col güei conocíu como Camín Primitivu, al que darréu se sumaron el Camín Costeru y el del Salvador. L´arquitectura popular, colos horros, paneres y cabazos como elementos más significativos, marquen el territoriu asturianu, nel que tamién ye bien amplia la representación del patrimoniu industrial, reflexu del intensu pasáu fabril de la comunidá.