Muséu de xestión pública creáu en 1984 a partir de la colección axuntada pol so fundador, José María Naveiras Escanlar (Pepe el Ferreiro). En 1989 treslladóse de los baxos de la Casa Conceyu a la so ubicación d´anguaño, ocupando la vieya Casa Rectoral de la villa, edificiu del sieglu XIX remocicáu. La esposición amuesa´l mou de vida de la sociedá campesina tradicional del occidente asturianu, incorporando tamién elementos d´otres partes d´Asturiesy de diverses zones peninsulares y europees. Ocupa una superficie de más de 3.000 m2 repartida en tres edificios qu´exemplifiquen distintos modelos d´arquitectura tradicional. Na Casa Rectoral recréense la vivienda y los trabayos campesinos. A Casoa, modelu de vivienda de la nobleza rural con capiya propia, acueye la escuela, el comerciu, la barbería y otros oficios nel ámbitu rural. La Casa del Molineru da abellugu al taller y les esposiciones temporales. Nel recintu del muséu allúguense, amás, el molín y otros elementos básicos na economía campesina ente los que destaquen los modelos de graneru, representaos por una panera, un cabazo y un horru con cubierta de paya de centén. Oficios como la tornería tradicional rescatáronse del escaezu y desenvuélvense de manera habitual nun muséu que sigue calteniendo al vocación de muséu vivu qu´inspiró la so fundación.

 

Consulta l'axenda d'actividaes y eventos equí.

Servicios

Visites guiaes pa grupos escolares - Esposiciones temporales - Demostraciones d´oficios tradicionales (temporada alta) - Xuegos tradicionales (temporada alta) - Biblioteca

Accesibilidá

Entrada al recintu del Muséu afayáu pa persones con movilidá reducida. Ascensor nel edificiu de “A Casoa”.

Accesu con mascotes

Almítese l´accesu con mascotes al recintu del Muséu, pero non a los edificios de les esposiciones.

Observaciones

Cola situación provocada pola crisis sanitaria de la COVID-19 los horarios del Muséu fueron afayándose a la evolución de la situación y a les recomendaciones hixénico-sanitaries pal públicu y pa los trabayadores dictaes poles autoridaes competentes. Nel apartáu “Horarios” tán reflexaos los horarios vixentes anguaño afayaos a estes circunstancies. Estos horarios podríen sufrir cambeos.