La educación sentimental del artista adolescente

Autor: Ángel de la Calle

Disciplina: Lliteratura

Descripción:

Nel 2005 Ángel de la Calle publicó Modotti, una mujer del siglo XX, pionera de la novela gráfica n’España, y nel 2017 publica la segunda, Pinturas de guerra. Agora, el confinamientu garrólu trabayando na siguiente.

Nel proyectu que nos propón, De la Calle narra cómo ellabora’l guión, busca la documentación y escribe y dibuxa l’empiezu d’esti llibru nuevu, ensin númberu de páxines definíu y de salida incierta. Amás, cúntanos cómo vive’l tiempu de creación y trabayu, cómo s’encara cola creación d’una tercer obra cuando les dos primeres tuvieron gran éxitu de crítica y públicu, y cómo les espectatives comerciales condicionen el llabor creativu de caldía. Amás, amuésanos la “cocina” del autor y el so material: los yá tradicionales papel, llápiz, borrador, rotuladores, tinta chino... xunto al escáner, l’ordenador, el Photoshop. Una xornada n’estudiu d’Ángel de la Calle y cómo la vida cotidiana interrumpe o potencia’l trabayu creativu. El codirector y cameraman ye Sergio de la Calle, guionista y director de Top 10 canciones de Sonic y La guerra de los mandos.

Ángel de la Calle empieza la carrera a últimos de la década de los 70 na revista Star. Na década de los 80 el so trabayu va apaecer de forma regular en cabeceres autóctones como Bésame Mucho, Rambla, Rampa, Zona 84, Comix Internacional o El Víbora, y en forasteres como la sueca Tung Metal, la francesa Fantastik o la norteamericana Heavy Metal.

Nel 2005 publicó Modotti, una mujer del siglo XX, pionera de la novela gráfica n’España y que depués de recibir delles nominaciones y premios en dellos países diba convertise nun longseller internacional al ser traducida a seis idiomes, ser llectura aconseyada nel bachilleratu artísticu pol Ministeriu d’Educación de Francia y tener decenes de reseñes en periódicos como Le Monde, El País, Frankfurter Allgemeine Zeitung, ABC, Folha de Sao Paulo o La Stampa de Turín. El llibru foi nomináu como meyor obra y meyor guión nel Salón Internacional del cómic de Barcelona y foi Premiu de la Crítica. Nel 2017 publicóse la so segunda novela gráfica, Pinturas de guerra, con ediciones en México, España, Francia, Italia, Cuba, Arxentina y traducción al gallegu. Recibió’l Premiu a meyor obra española nel salón de Barcelona, Premiu de la Crítica a meyor obra española y Premiu de la Crítica a meyor guión. Foi Selección Oficial d’Angoulême nel 2019.

Na so faceta de críticu y estudiosu del cómic, publicó los llibros Hugo Pratt, la mano de Dios, Steranko Superstar y El hombre enmascarado, en el sendero. Ye organizador del festival multicultural Selmana Negra de Xixón y fundador de les Xornaes Internacionales del Cómic Villa d’Avilés.