Por munchu trabayu que cueste, la tradición nun ruempe

Autor: Rubén Bada

Disciplina: Música

Descripción:

Trátase de facer un percorríu pel procesu creativu d’unmúsicu “tradicional asturianu” del añu 2020, al traviés del filtru de la música académica na que se formó y de toles músiques urbanes y populares que lu arrodien. El fechu de trabayar esclusivamente nuna llingua n’extinción como l’asturianu acentúa’l debate internu ente la búsqueda de la “universalidá” al traviés del soníu musical dende lo “propio” xeneráu dende’l soníu de la nuesa fala.

Rubén Bada ye ún de los músicos folk asturianos con más proyección internacional. Violineru, guitarrista y conocíu más que nada por tocar el bouzouki. Foi parte de grupos como Xéliba o DRD, andechó cola Banda Gaites Llacín, Mari Luz Cristobal Caunedo o Tejedor. Anguaño ye la metá del grupu L-R; ye parte de la banda de Rodrigo Cuevas; amás de tocar con Aú?, Alce y Navaya y Alfredo González, Silvia Quesada y collaborar cola Banda Gaitas el Trasno de Cuaña. Nel planu internacional foi parte del grupu irlandés At First Light y collaboró con figures de la escena folk europea como’l gaiteru John McSherry, el “gaiteiro” gallegu Anxo Lorenzo o l’irlandés Barry Kerr. Tamién foi parte del primer discu en solitario de Sylvain Barou. Bada ganó un primer premiu nel concursu de pareyes instrumentales del Muséu del pueblu d’Asturies y cuenta con un premiu Amas de la crítica musical asturiana como meyor instrumentista. Amás foi escoyíu como músicu de la “house band” del programa Port de la BBC,n’andecha col canal irlandés TG4, pa un programa sobre música asturiana nuna serie sobre la música de les “naciones celtes”.