Qanat

Autor: Elisa Cuesta

Disciplina: Artes plásticas

Descripción:

Qanat ye una investigación artística sobre infraestructures tecnopolítiques, sistemes biolóxicos distribuyíos y intelixencia artificial. Trátase d’un proyectu collaborativu lleváu alantre pola diseñadora madrilana Victoria de la Torre, l’arquitectu madrilanu Pedro Arnanz y l’artista asturiana Elisa Cuesta, ganadora del premiu Asturies Xoven 2019. Qanat surde d’un interés compartíu por esplorar los sistemes complexos y líquidos que tán entetexíos nes nuestres sociedaes y ecosistemes. Per un llau, trata de revelar lo que queda escondío detrás de les nociones de progresu y innovación infinitos qu’articulen el sistema globalizáu y, per otru, busca cuestionar el nuestru autoasignáu rol antropocentrista nos ecosistemes qu’habitamos, poniendo en valor formes alternatives d’intelixencies y de conocimientu.

Nel videu que nos presenta, Cuesta va dir esbillando’l procesu de trabayu que tán llevando alantre nesta investigación, poniendo énfasis especial n’amosar cómo xestionen el trabayu a pesar del confinamientu, amás de n’esplicar con más detalle la relevancia de los conceptos que desenvuelven.

Elisa Cuesta ye una artista y diseñadora asturiana qu’investiga enfoques críticos del habitar conectáu. Nel so proyectu más recién, Skeens, fai visible’l xuegu de tensiones existente ente’l valor comercial y emocional de los datos privaos de los usuarios de redes sociales pente medies d’oxetos rellacionaos cola tradición testil. Skeens desenvolvióse mentes tuvo na XI residencia LABXoven_Los Bragales en Llaboral Centru d’Arte. Nel 2019 recibió’l premiu Asturies Xoven d’Artes Plástiques. Coordinó y ayudó a producir eventos rellacionaos col arte y la tecnoloxía, como’l Festival Tentacular o MADATAC, y nel 2017 foi la directora d’arte del llaboratoriu ciudadanu Medialab-Prado. Actualmente ye vicepresidenta d’AIDI. Xunto al arquitectu Pedro Arnanz y la diseñadora Victoria de la Torre, forma parte de Qanat.