Pallabres de contrabandu

Autor: Alicia Andrés Ramos

Disciplina: Artes escéniques

Descripción:

En plenu procesu de creación d’una dramaturxa o "partitura" oxetual, Alicia Andrés presenta esti proyectu col que quier cuntar una hestoria familiar, la de la so bisagüela y el so primer y desconocíu home, Timoteo López, qu’atopó’l so testamentu no fondero d’un baúl, y que yera amu de la casa qu’habiten tolos branos. Gracies a esti documentu d’últimos del s. XIX, que ye un auténticu inventariu manuscritu de trastes, foi quién a identificar los oxetos cotidianos que pudieron pertenecer a esti home, que nun foi’l so bisagüelu porque morrió con poco más de trenta años, y agora trata de reconstruyir la so hestoria.

A partir d’un par de datos reales -esi home tuvo una tabierna y según el güelu d’Alicia "foi l’inventor de la escuela nel pueblu"- y del propiu discursu que los oxetos xeneren, va construyir un diálogu ente dos tiempos pa cuntar la intrahestoria d’aquellos que’l so nome naide recuerda y asina recuperar el tiempu cuando esos oxetos yeren útiles.

Alicia Andrés Ramos ye llicenciada en Periodismu pola Universidá Complutense de Madrid, oficiu qu’exerció en dellos medios como’l diariu La Nueva España o les revistes culturales Escenarios o ShowPress, ente otres. Col volume Melancolía y otros pájaros empieza la so trayectoria lliteraria nel xéneru del rellatu curtiu, que sigue cola edición de la obra de teatru Un hombre sueña y Hilatura, novela que va ver la lluz nel 2020.