El quimérico inquilino

Autor: Avelino Sala

Disciplina: Artes plástiques

Descripción:

L’artista xixonés Avelino Sala presenta esta pieza que se presenta como una ventanina al trabayu que pue facese nel estudiu en tiempos de confinamientu. El proyectu céntrase nun exerciciu prácticu de trabayu nel so estudiu-casa en Madrid. Asina, Sala va esplicar y va desenvolver en dellos planos secuencia la práctica artística del so propiu trabayu al traviés del estudiu de la producción de delles series d’obres, en concreto d’aquelles qu’agora tien nel estudiu: series d’acuareles (El Despertar de la Palabra), series de plumes (Mirror stage, Icaro…) y dalguna serie escultórica con llibros llacaos.

Avelino Sala ye artista, comisariu d’esposiciones y editor. El so trabayu como artista llevólu a cuestionar la realidá cultural y social con una mirada crítica y poco cómoda nun esplorar de contino l’imaxinariu social y políticu. Los sos proyectos esploten la capacidá del arte pa xenerar espacios d’esperimentación que dean pie a realidaes nueves. Sala ye ún de los referentes españoles del arte como resistencia política.

Dende la década de los 2000, Sala trabaya nel contestu global del arte contemporaneu, esponiendo y participando en bienales y instituciones como la Bienal del Fueu de Caracas (2006), VideoZone V Bienal de Videu Arte de Tel Aviv (2010), Nightcomers, 10 Bienal d’Estambul (2007), Bienal del Fin del Mundu (2011), Bienal d’Istmo Centro Americano de Guatemala (2014) o la Bienal Sur, Juntos aparte (2019). El so trabayu preséntase nel 2020 nun gran proyectu nel Centre del Carmen de Valencia onde se desenvuelven les temes nos que lleva años trabayando: les migraciones, la dislocación contemporánea, la crisis medioambiental y les paradoxes del capitalismu.