Primas Hermanas: crear a distancia en cuarentena

Autor: Primas Hermanas (Covadonga de Silva y Antia Eseuve)

Disciplina: Música

Descripción:

Nesti proyectu audiovisual de cuarentena, Primas Hermanas van amosar el so procesu creativu a la hora de componer canciones a cuatro manes, ente dos persones que s’atopen confinaes en dos domicilios estremaos, en dos ciudades diferentes y en dos situaciones vitales distintes.

Covadonga de Silva y Antía Eseuve, Primas Hermanas, van enseñar, amás de la cotidianidá peculiar de caúna, les sos dificultaes pa crear, pero tamién les oportunidaes qu’apaecen en situaciones aparentemente hostiles, onde munches de les esperiencies habituales desapaecieron o quedaron menguaes. ¿Cómo fluye la creatividá nesti contestu? ¿De qué fontes beben les artistes? Nesti videu van amosar (apoyándose nel sentíu del humor) cómo, a pesar del contestu nuevu y cambiante, dambes son quién a facese fuertes, crear en conxuntu y dar forma a una canción nueva, sofitándse nos espacios virtuales y les tecnoloxíes nueves.

Primas Hermanas son Covadonga de Silva (Penélope Trip, Nosoträsh, Petit Pop) y Antía Eseuve (Casa Manuela, Concertino, Eseuve), auníes nun proyectu de pop onde la sororidá ta mui presente, amás de les referencies a los sos raigaños. El sentíu del humor ye pa elles mui importante a la hora de crear. Parten de que rise de los drames cotidianos ye menester pa sobrevivir (emocionalmente). N’ochobre del 2019 presentaron el so primer llarga duración Miss Medolías, un trabayu señardosu y reflexivu, pero con tonu frescu y optimista.