Nelón confináu

Autor: Producciones Nun Tris

Disciplina: Artes escéniques

Descripción:

Esti proyectu de Nun Tris trata d’amosar los oríxenes del monólogu asturianu en xeneral y d’allugalu dientro del universu escénicu asturianu en particular. A partir del casu concretu del personaxe de Nelón (protagonista d’otres representaciones de la compañía) trátase de dar visibilidá al trabayu de dirección (sentíu del personaxe y de la escenificación), d’interpretación (particularidaes del personaxe y recursos actorales) y de la dramaturxa (emplegu de recursos dramáticos y estéticos que, calteniendo la esencia orixinal del monólogu asturianu, lu faigan únicu y lu estremen d’otres propuestes asemeyaes).

Antón Caamaño ya Inmaculada Rodríguez formen la compañía Producciones Nun Tris, que lleva dende 1997 desendolcando la so actividá profesional, cuntando hasta agora con más de cincuenta estrenos d’obres de tolos estilos y pa tolos públicos. Los sos montaxes dixébrense en dos grandes estayes: l’estudiu ya investigación sobre’l teatru asturianu y el teatru en castellán. Rescampla na so trayectoria la versatilidá de los sos trabayos, atendiendo siempres al afondamientu na tradición y a la gueta de formes nueves.

Espectáculos como Aire, Los remedios de la vixigona, El criáu de dos amos o Los amorinos de Bastian y Bastiana son exemplu d’ello, como tamién l’espectáculu Los socedíos de Nelón, una esbilla de monólogos asturianos que nestos díes cumple venti años dende la so estrena.