Pantasma

Autor: Leticia Baselgas

Disciplina: Música

Descripción:

Pantasma ye parte d’un proyectu workinprogress que la música y artista Leticia Baselgas tien n’activo dende l’añu 2016.

La tresdisciplinariedá ente los formatos del arte ye una necesidá plástica pa Leticia Baselgas. Exemplu d’ello son les llinies creatives que xunten la música (dende el so proyectu musical L-R xunto a Rubén Bada) y la pintura o la video-creación (dende la so faceta como creadora plástica). Más en concreto, en Cantar, CREAR, tocar la pandereta. Tresferencies ente l’arte y la música tradicional, amuésase cómo la poética d’una artista pue entemecese dende trés formes d’espresase diferenciaes: l’actu performáticu de tocar la pandereta como un fechu simbólicu -y cuasi chamánicu- del “percutir” piel animal; cantar dende “la tradición”, al traviés d’un imaxinariu simbólicu arcaicu representáu pola tresmisión oral de lo que l’artista llama “la voz ensin nome”; crear, dende una perspectiva estendida, na que tola potencia creativa tresfórmase en fuerza espresiva, plástica y, sobre too, vital.

En definitiva: el proyectu quier amosar cómo la música y l’arte configuren non solo un mediu d’espresión, sinón tamién una forma de significase dende la memoria y la construcción d’un imaxinariu “poético-plásticu”.