Artes escéniques

Autor: Dana Raz

Disciplina: Artes escéniques

Descripción:

L’estáu de confinamientu nel que nos alcontramos actualmente condiciona la creación artística a munchos niveles y resulta llimitante sobre manera en danza, una disciplina lligada íntimamente al espaciu y al contactu físicu. Sicasí, pa la coreógrafa Dana Raz la creatividá munches veces surde del conflictu que la obliga a replantear conceptos que de mano paecen inamovibles.

Asina, el proyectu Way out va tentar d’esplicar cuálos de los estadios habituales nel montaxe d’una coreografía puen caltener la so evolución “normal” y cuáles precisen una reinterpretación fonda. Esti rellatu sofítase nel procesu creativu de la obra de danza contemporánea Way out, inspirada na situación actual tan particular y que parte de la fobia a los espacios zarraos, de les barreres físiques y de lo tanxible, pa evocar una reflexón interior que nos dexe planteanos cuestiones rellacionaes más íntimamente coles llimitaciones propies o los mieos interiores.

Dana Raz ye baillarina y coreógrafa d’orixe israelín. Como baillarina trabaya pa delles compañíes como Muza Company, la International Kibbutz Contemporary Dance Company -una de les compañíes más prestixoses de danza contemporánea- y Cinefuegos Danza, ente otres. Compaxina la so actividá como baillarina cola de coreógrafa y estrena les obres Man_O (2014), Wolves (2016), Kiluf (2017), Tesela (2018), Etzem Zar (2019) o Muktzeh (2020), ente otres.

Ye xerente de Dana Raz Dance Projects dende’l 2014 y imparte workshops n’escueles de danza de tol mundu. Recibió’l Premiu Yair Shapira pola so contribución a la danza n’Israel y el Premiu Serondaya de les Artes pola so innovación na cultura.