26/05/2021.- La Sociedá Pública de Xestión y Promoción Turística y Cultural del Principáu d’Asturies abrió les convocatories de los circuitos de música y d’artes visuales d’Asturies, Cultura en Rede pa la so programación posterior. Los circuitos d’Asturies, Cultura en Rede son un proyectu dela Conseyería de Cultura, Política Llingüística y Turismu realizáu en collaboración colos conceyos asturianos y xestionáu pola sociedá pública.

Pal circuitu de música, van escoyese proyectos musicales interpretaos por bandes y/o solistes musicales, realizaos o propuestos por profesionales, promotores o distribuidores asturianes, d’ente los que formen parte del Catálogu de l’Actividá Musical asturiana. A partir de la selección va conformase un rexistru que se pon a disposición de los Conceyos axuntaos a esta iniciativa pa qu’escueyan los proyectos que quieran incorporar a la so programación del segundu semestre del 2021. Les solicitúes pa esti circuitu puen presentase hasta’l 31 de mayu, a les 14:00 hores.

Nel circuitu d’artes visuales van escoyese proyectos espositivos inéditos y actividaes complementaries de cualquier disciplina artística dientro de les artes visuales pa la ellaboración d’un catálogu que valga pa la programación posterior d’esposiciones en sales o espacios culturales allugaos nel Principáu. Les solicitúes pa esti circuitu puen presentase hasta’l 21 de xunu, a les 14:00 hores. Los proyectos escoyíos van desenvolvese en dos fases: el diseñu, desenvolvimientu y producción va llevase a cabu primero del 31 d’avientu del 2021; y la exhibición va facese a partir del 1 de xineru del 2022 y con una duración mínima d’un mes por sede o conceyu.

Les bases de les convocatories puen consultase na web asturiesculturaenrede.es.