18/05/2021.- Del 19 de xunu al 28 d’agostu la Sociedá Pública de Promoción Turística y Cultural del Principáu d’Asturies va poner en marcha 11 rutes del programa D’itinerarios pel Patrimoniu, un proyectu de la Conseyería de Cultura, Política Llingüística y Turismu que busca visibilizar y facilitar l’accesu del públicu al patrimoniu cultural asturianu, tan numberosu y variáu.

La celebración del Xacobéu 21 va ser el filo conductor d’esta edición, con percorríos guiaos per conceyos y monumentos que’l pelegrín atopa al so pasu nes distintes rutes xacobees que traviesen el Principáu y que dexen conocer, por exemplu, el patrimoniu lligáu al Prerrománicu Asturianu, a la cultura indiana, a la cultura sidrera, a la cultura vaquera o a pueblos marineros.

La salida y llegada de tolos itinerarios va realizase n’Uviéu y dalguna de les rutes incluye posa n’Avilés o en Xixón.

Les entraes pa participar en cada ruta punxéronse güei a la venta y tienen un preciu de 18 euros o de 15 euros pal públicu infantil ente 4 y 11 años, grupos de más de 10 persones, visitantes con Pasaporte Cultural o con tarxeta del Club Cultura Principáu d’Asturies. Les localidaes puen sacase presencialmente nes oficines de Curín Servicios Integrales de Turismo, de llunes a vienres n’Uviéu, y al traviés de la web www.hazteunbus.es.

Percorríos

• 19 de xunu. El Camín qu’entamó Alfonso II.
• 26 de xunu. El Camín de Santiago de la Costa pela zona central, Cabo Peñes, Avilés y contorna.
• 3 de xunetu. El Camín de Santiago de la Costa pela zona oriental vinculáu a pueblos marineros.
• 10 de xunetu. El Camín de Santiago de la Costa pela zona oriental vinculáu a la cultura indiana.
• 17 de xunetu. El Camín de Santiago de la Costa pel Nalón de Baxo.
• 24 de xunetu. El Camín de Santiago pel Occidente.
• 31 de xunetu. El Camín de Santiago Primitivu.
• 7 d’agostu. El Camín de Santiago Primitivu vinculáu a la cultura vaquera.
• 14 d’agostu. Conexón del Camín de Santiago de la Costa col Camín Primitivu vinculáu a la cultura sidrera.
• 21 d’agostu. Conexón del Camín Francés col Camín Primitivu.
• 28 d’agostu. Conexón del Camín Francés col Camín Primitivu dende Ayer de Riba.