17/05/2021.- La Conseyería de Cultura, Política Llingüística y Turismu abre la convocatoria pa la creación d'un Catálogu de l'Actividá Musical Profesional Asturiana. Esti catálogu va dexar cuntar con un instrumentu d'análisis y valoración de la situación actual de la música asturiana y, amás, va poder sirvir de soporte a la programación cultural promovida pola alministración asturiana, n’especial al so circuitu cultural de música, que va tomar como base esti catálogu.

Reconociendo la relevancia especial que dientro del panorama cultural asturianu tienen les actividaes musicales realizaes por artistes, grupos y empreses de distintos perfiles profesionales, qu'en bien de casos trespasen les fronteres de la mesma Comunidá Autónoma, convirtiéndose n'importantes representantes y valedores de la cultura asturiana n'otros territorios, considérase fundamental que la Conseyería de Cultura, Política Llingüística y Turismu sofite les producciones de los mentaos grupos profesionales.

Por ello, procédese a la creación d'un Catálogu de l'actividá musical asturiana de calter profesional, como instrumentu de conocencia de la realidá actual del sector y como mediu que faiga posible una programación cultural de calidá por parte de les alministraciones públiques asturianes.

Van poder formar parte d'esti catálogu producciones musicales d'artistes, grupos y empreses profesionales del sector musical allugaes n'Asturies, qu’habrán inscribise nun plazu de diez (10) díes naturales desque entre en vigor la resolución publicada nel BOPA  N.^u 93 del llunes 17 de mayu del 2021, al traviés de la web https://panel.asturiesculturaenrede.es

Consulta tola información y les bases completes de la convocatoria equí.