Bimenes, Cabranes, Colunga, Nava, Sariegu y Villaviciosa comparten les actividaes d’un programa diseñáu n’homenaxe a la cultura sidrera asturiana

Hevia, Los Berrones, Petit Pop o les orquestes Tekila y Dominó, na programación musical de los díes festivos

Vanessa Gutiérrez destacó’l Día d’Asturies como la fiesta d’alcuentru ente los y les asturianes, y reivindicó “esti modelu de celebración itinerante y compartíu, que refuercia la cohesión territorial”

27/08/2025.- El Gobiernu del Principáu d’Asturies festexa nos conceyos qu’integren la Comarca de la Sidra, del 5 al 8 de setiembre, los actos conmemorativos del Día d’Asturies, qu’anguaño rinden homenaxe a la cultura sidrera, depués de la so reconocencia como Patrimoniu Cultural Inmaterial de la Humanidá pola UNESCO.

La conseyera de Cultura, Vanessa Gutiérrez, el director xeneral de Retu Demográficu, Marcos Niño y l’alcalde de Villaviciosa, Alejandro Vega, acompañaos de los alcaldes de Bimenes, Cabranes, Colunga, Nava y Sariegu, presentaron esta mañana’l programa d’actividaes gratuites que va acoyer caún de los conceyos anfitriones.

La Comarca de la Sidra intégrenla seis conceyos del centru-oriente asturianu, Bimenes, Cabranes, Colunga, Nava, Sariegu y Villaviciosa, que comparten un denominador común, la producción sidrera. La celebración d’esta festividá emblemática na comarca supón asina un homenaxe a la declaración recién de la cultura sidrera asturiana como Patrimoniu Mundial.

Amás de la sidra, la música, la cultura y la tradición protagonicen una programación completa que va combinar mercaos tradicionales, muestres de gastronomía, exhibiciones de deportes y xuegos autóctonos, actividaes infantiles y espectáculos de cai. El patrimoniu históricu y natural de la comarca tamién va tener un papel protagonista, con visites

guiaes, talleres y propuestes pa tolos públicos, nun programa diseñáu pa disfrutar en familia y abiertu a residentes y visitantes.

La conseyera de Cultura, destacó que “el Día d’Asturies ye la gran fiesta d’alcuentru de les y los asturianos: conmemoramos lo que somos y lo que proyectamos al mundu. Amás, anguaño facémoslo poniendo en valor la cultura sidrera y la collaboración ente conceyos, como yá ocurrió l’añu pasáu cola celebración conxunta nos trés conceyos de los Ozcos”.

Nesti sentíu añedió que “esti modelu itinerante y compartíu refuercia la cohesión territorial: cada conceyu apurre la so personalidá y, xuntos, texemos una programación abierta a families, residentes y visitantes que disfruten de les nuestres tradiciones, el nuestru patrimoniu y la nuestra música”.

El Día d’Asturies va ser de nuevo, d’esta forma, una fiesta grande d’alcuentru alredor de les nuestres tradiciones, cola cultura sidrera como símbolu y nexu común.

• Sariegu (5 de setiembre, tarde-nueche). El programa empieza con una exhibición de deporte tradicional en Vega y el pasucáis al cargu de la Bandina L’Emboláu. En Narzana, el públicu va disfrutar de les visites teatralizaes y actuaciones musicales d’Amaia Rey y del Coru Errante na Cueva de San Pedrín. Tamién van poder visitase’l Llagar Trabanco y la Yeguada Finca Maeza y va haber espicha con degustación de productos típicos. Zarra les actividaes en Sariegu’l conciertu de Los Berrones y de la Orquesta Grupo Límite.
• Colunga (6 de setiembre, mañana). El públicu que visite’l conceyu de Colunga esti día va tener entrada gratuita al Muséu del Xurásicu d’Asturies (MUXA), que va ufiertar actividaes especiales tol día, como una visita al xacimientu d’icnites de la playa de La Griega en collaboración col Centru d’interpretación del Sueve, una Yincana Dinosidrera o un taller de mayáu de mazana, ente otres actividaes. Amás, en Colunga, va poder disfrutase d’un pasucáis cola Bandina L’Emboláu, la esposición Sidra na Casa la Cultura, y del conciertu de Petit Pop na plaza de la ilesia de San Cristóbal.
• Villaviciosa (6 de setiembre, tarde-nueche). El centru de la villa va enllenase cola música de les bandes de gaites participantes nel Festival Internacional de la Gaita y el Parque del Pelambre va acoyer el mercáu d’esti Festival. Tamién va haber xornada de puertes abiertes nos llagares El Gaiteru y Cortina, con un tren sidreru con animación.
  La música centra la programación en Villaviciosa, que va acoyer los conciertos del gaiteru Hevia y de la cantante asturiana moza Eva Hevia. Tamién, en collaboración col Festival Internacional de la Gaita, van ufiertase les actuaciones de Malin Lewis, Felpeyu y Skama La Rede, amás d’un espectáculu de drones.
• Cabranes (7 de setiembre, mañana). Al mercáu tradicional na Plaza del Emigrante de Santolaya, súmase na Casa la Cultura la esposición Cabranes, cultura y tradición. Los más pequeños van disfrutar colos Juegos a lo grande y va haber degustaciones de sidra y zusmiu ecolóxicos y d’arroz con lleche y boroña, amás d’una preba de sidra con Tano Collado.
  Tamién se va realizar un taller d’axedrez y partíes simultánees y una demostración del traxe tradicional de Cabranes, van ufiertase vuelos cautivos de globu aerostáticu y, a lo llargo de tol día, va haber entrada gratuita al Muséu de la Escuela Rural, en Viñón. La nota musical van ponela los pasucáis d’Hermanos Joglar y el conciertu sesión vermú de Los Acebos.
• Bimenes (7 de setiembre, tarde-nueche). Na capital del conceyu, Martimporra, va poder disfrutase d’una xornada de puertes abiertes y animación teatral nel Palacio Marqués de Casa Estrada. Los Yerbatos y La Pandorga van ser los encargaos de l’ambientación musical y folclórica nel prau del Palaciu, onde tamién va haber canción asturiana y va poder vese una exhibición de valtu, amás de participar nuna degustación y ellaboración en vivo de chorizu a la sidra. Les actividaes en Bimenes rematen col conciertu de la Orquesta Dominó.
• Nava (8 de setiembre, mañana-tarde). El Muséu de la Sidra ufierta esti día entrada gratuita a tolos visitantes, que tamién van poder disfrutar de canción asturiana, d'ambientación costumista na redolada del equipamientu, d’una clase maxistral de sidra y d’una preba de sidra con José Norniella. En Nava va haber mercáu y xuegos tradicionales y van ufiertase vuelos cautivos de globu aerostáticu, amás d’un tren sidreru con animación pola villa y el pasucáis de la Banda de Gaites Llariegu.
  La ilesia de San Bartolomé va acoyer l’alcuentru colos coros de la Comarca de la Sidra y na Plaza Manuel Uría va poder vese l’actuación sesión vermú de Querida Margot y el conciertu de la Orquesta Tekila.

Les visites teatralizaes a la Cueva de San Pedrín, les visites guiaes a llagares de Sariegu y Villaviciosa y a la Yeguada Finca Maeza, delles actividaes nel Muséu del Xurásicu d’Asturies y los vuelos cautivos de globu aerostáticu tienen places llimitaes, polo que ye menester realizar inscripción previa na web https://entradas.turismoasturias.es.

El programa completu pal Día d’Asturies pue consultase en https://asturiesculturaenrede.es.