La final del concursu va facese’l vienres 29 de payares nel Teatru de La Llaboral de Xixón

Cultura reivindica col certame la herencia de “La Busdonga” y la importancia de la canción asturiana

El primer Premiu d’Asturianada Obdulia Álvarez “La Busdonga”, convocáu pol Gobiernu d’Asturies, yá tien finalistes. Depués de la celebración de trés semifinales a lo llargo d’esti mes en Cangas del Narcea, La Pola Siero y La Felguera, el xuráu del certame escoyó pa pasar a la final a dos aspirantes por caúna de les modalidaes que contempla’l gallardón: absoluta femenina, absoluta masculina y moza.

Las persones escoyíes son, respectivamente, Lorena Corripio López y Alicia Villanueva Megido; Sergio Menéndez Fernández y Carlos Velasco Montes; y Néstor  Díaz González y Marina Carbajosa González.

La final va celebrase’l vienres, 29 de payares, nuna gala nel Teatru de la Llaboral de Xixón a las 19 hores. Depués de l’actuación de los finalistes, y de la que’l xuráu delibera, van cantar dos intérpretes consagraos na canción asturiana, como son Mari Luz Cristóbal Caunedo y Jorge Tuya Rivas. La entrada ye gratuita, pero ye menester retirala primero nes taquilles habilitaes pa ello o al traviés de la web de Llaboral Ciudá de la Cultura.   

En premios, la Conseyería de Cultura, Política Llingüística y Deporte destina una suma de 15.000 euros repartíos en 6.000 euros pa la categoría masculina, 6.000 euros pa la categoría femenina y 3.000 euros pa la categoría moza. Con esta iniciativa búscase promover y difundir la canción asturiana, una de les manifestaciones culturales más significatives de la comunidá autónoma, declarada Bien d’Interés Cultural de calter inmaterial nel 2015.

La Conseyería de Cultura escoyó la figura de Obdulia Álvarez Díaz, más conocida como “La Busdonga”, pa dar nome a esti certame de música asturiana cola mira de reivindicar la trayectoria d’una muyer que na primer mitá del sieglu XX impúnxose a los estereotipos de la época y consiguió destacar pol so talentu musical.