Les compañíes y artistes del Principáu van poder incluyir referencies a los sos espectáculos susceptibles de ser programaos pa la so exhibición

La Conseyería va tomar esti catálogu como base pa la programación del Circuitu d´Artes Escéniques del programa Asturies, Cultura en Rede

08/01/2021.- La Conseyería de Cultura, Política Llingüística y Turismu abre la convocatoria para la creación d´un Catálogu de l´Actividá Escénica profesional asturiana, como preséu de conocimiento de la realidá actual del sector y como mediu que va facer posible una programación cultural de calidá per parte de l´Alministración autonómica asturiana.

Les artes escéniques cunten con especial relevancia nel mundu cultural asturianu, tienen  llarga trayectoria na rexón y muestren una notable vitalidá y adaptación a los llinguaxes y tendencies espresives más actuales, destacando pola so creatividá ya inxeniu.

Poro, considérase necesario cuntar con un catálogu de l´actividá escénica, nel que les distintes compañíes o artistes profesionales puedan incluyir detalles de los sos espectáculos que puedan ser susceptibles de ser programaos pa la so exhibición.  Amás, esti catálogu va permitir cuntar con un preséu d´analís y valoración de la situación actual de les artes escéniques asturianes y, va sirvir de soporte a la programación cultural promovida pola Alministración asturiana,  cuantimás al Circuitu d´Artes Escéniques del programa Asturies, Cultura en Rede, que va tomar como base esti llistáu.

Van poder formar parte d´esti catálogu producciones escéniques de compañíes y empreses escéniques aniciaes n´Asturies, pertenecientes a los ámbitos de la danza, teatru, circu, maxa, teatru d´oxetos y títeres, que tendrán d´inscribise antes del martes 19 de xineru del 2021 al traviés de la web https://panel.asturiesculturaenrede.es

Consultar tola información y les bases completes de la convocatoria aquí.