Clases de baille tradicional, teatru, poesía, esposiciones, gastronomía y actuaciones de Marisa Valle Roso y Skama la Rede son delles de les propuestes qu’ufierta’l festival

Los detalles de la programación tán disponibles na web www.asturiesculturaenrede.es

03/10/2024.- La Conseyería de Cultura, Política Llingüística y Deporte entama la tercer edición de la feria d’empreses y cultura n’asturianu Reguerada Fest. Esta mañana’l director xeneral d’Acción Cultural y Normalización Llingüística, Antón García, presentó’l programa del eventu que col so nome rinde homenaxe a Antón de Marirreguera, nacíu nel conceyu de Carreño y autor de la que se considera la primer obra lliteraria conservada n’asturianu.

D’esta manera, el Reguerada Fest va facer de Candás el puntu d’alcuentru de delles disciplines artístiques y el mundu de la empresa y la comunicación los díes 11, 12 y 13 d’ochobre, con una programación pensada pa tolos públicos qu’incluye una feria, recitales lliterarios, talleres, charles, esposiciones o conciertos que se van facer na Fábrica d’Ortiz, el Teatru Prendes y la Biblioteca de Candás.

La inauguración de la esposición La voz de la nortiada, una instalación visual y sonora del artista Ánxel Nava, va marcar el principiu de les actividaes del Reguerada Fest el vienres 11 d’ochobre na Fábrica d’Ortiz, sitiu que tamién va acoyer el mercáu y feria de llibros y empreses, con ventiún entidaes participantes. A estes propuestes xúntense los recitales poéticos, alcuentros con autores y meses redondes, amás del cuntacuentos con Fraile Dorado, Pintar-Pintar, Higiénico Papel Teatro y una ruta cultural y lliteraria per Candás. Van facese al empar talleres, con places limitaes, d’iniciación al baille tradicional, de bordáu con abalorios, de composición de cantares o de conserves.

A lo llargo del festival va haber conciertos de Marisa Valle Roso y Skama la Rede, ademáis d’un pasucáis al cargu del Grupu de Baille San Félix. El públicu tamién va poder disfrutar del conciertu Canciones pa la xentiquina, con una escoyeta sentimental de Nacho Fonseca al cargu d’Alicia Álvarez. El Teatru Prendes va acoyer les representaciones de Perendi, de La Compañía del Alba, y d’Hasta que to ma nos separte, del grupu de teatru navetu La Puente Arriba. Amás, na Biblioteca de Candás l’escritor Xurde Fernández va tener un alcuentru colos integrantes del Club de Llectura del centru sobre’l so llibru Caledonian Road.

Toles actividaes, sacante la qu’entama’l Teatru Prendes, van ser de baldre. Los detalles de la programación, coordinada por Xaime Martínez, tán disponibles na web asturiesculturaenrede.es, onde tamién se pueden sacar les invitaciones pa participar nes actividaes con tope de places.