De xunetu a avientu va haber 45 actuaciones de 21 artistes, grupos y promotores en 45 conceyos

06/08/2024.- La música protagoniza n’agostu les cites col circuitu de cultura tradicional d’Asturies, Cultura en Rede,qu’esti mes va llegar a 12 conceyos asturianos coles actuaciones de 9 artistes, grupos y promotores de la rexón.

Abre la programación del circuitu pa esti mes el conciertu que la banda Los Gascones va ufiertar mañana 7 d’agostu en Ribeseya y que, con una propuesta desenfadada qu’entemez los ritmos más tradicionales col rock o’l pop, van facer baillar a grandes y pequeños. El grupu va mostrar tamién el so bon facer el día 31 en Casu y en Santalla d’Ozcos.

Llanera va acoyer el 8 d’agostu’l conciertu Corri-corri de la Orquesta Céltica Asturiana y, el día 13, La Bandina’l Fuelle va facer parada en Somiedu, onde van guiar al públicu nun percorríu, al traviés de la música, pela cultura tradicional asturiana y otres que faen frontera cola rexón. El sábadu 17 van poder escuchase los Cancios tradicionales d’Asturies de Tina Gutiérrez n’El Franco y la poética de Rubén Bada y Pepín de Muñalén va resonar el 30 de agostu en Grau.

Amás de la música tradicional, n’agostu tamién se va poder escuchar el podcast rural Dalle mio nena de Melodijopérez -los díes 17 en Cabrales y 31 en Pravia- y disfrutar de los xuegos tradicionales que VA Verdeyazul van desplegar el día 21 en Tapia. Tamién va haber sitiu pa la divulgación cola conferencia La gaita n’Asturies: del Gaiteru de Lliberdón al Conservatoriu, que va ufiertar Rodrigo Joglar el llunes 19 en Cabranes, y pa la danza y les artes escéniques más contemporánees con Aire…!, una producción de Nun Tris que llega’l miércoles 21 a Villaviciosa.

Pal periodu de xunetu a avientu, nel marcu del circuitu de cultura tradicional programáronse 45 actuaciones de 21 artistes, grupos y promotores en 45 conceyos asturianos. La programación actualizada pue consultase n’asturiesculturaenrede.es.

Los circuitos d’Asturies, Cultura en Rede son un proyectu de la Conseyería de Cultura, Política Llingüística y Deporte, realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.