01/12/2023.- Cantos de amor por la tierrina, Xente y CalcoManías espónense esti mes d’avientu col circuitu d’artes visuales d’Asturies, Cultura en Rede, un proyectu de la Viceconseyería de Cultura, Política Llingüística y Deporte, fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.

En Castrillón ábrense al públicu dos muestres güei vienres 1 d’avientu: Cantos de amor por la tierrina d’Ediciones Pata Negra, onde un colectivu d’artistes gráficos (Natalia Pastor, Breza Cechini, Mario Cervero, Fermín Santos, Pedro Domínguez Carazo, Consuelo Vallina, Cesar Ripoll, Herminio, Fernanda Alvarez y Ana Vila) presenta una esposición=poemariu onde se divulga y pon en valor los poemes llíricos y narrativos de José María García; y Xente de Pablo Casanueva, con semeyes, proyecciones paisaxístiques y una videocreación que componen una mirada nueva a la serie fotográfica espuesta nel 2013, retratu d’una xeneración de persones de Ribeseya y formes de vida que, cuasimente, desapaecieron.

Dambes muestres pueden visitase hasta’l 19 de xineru viniente nel Valey Centru Cultural de Castrillón.

El 4 d’avientu qu’entra les CalcoManías de Eugenia Fernández Tejón lleguen a Mieres, onde van poder vese hasta’l 29 d’avientu viniente na Sala d’Esposiciones de la Casa de Cultura Teodoro Cuesta. CalcoManías ye un proyectu de 20 semeyes, interveníes con calques cerámiques atopaes na antigua Fábrica de Loza de San Claudio y onde tamién s’usen aplicaciones cerámiques. Con esta obra búscase una forma alternativa d’espresión acullá del formatu fotográficu tradicional, al traviés de la intervención de la imaxe con otros elementos plásticos propios de les artes aplicaes y les artes decoratives.