Ábrese la convocatoria d’escoyeta d’espectáculos que van programase nesta muestra

07/03/2023.- Llaboral Ciudá de la Cultura va ser la sede d’Escena en Rede, Muestra d’Artes Escéniques, una muestra sectorial dedicada a les artes escéniques que va desenvolvese del 23 al 26 de mayu nel marcu d’Asturies, Cultura en Rede, un proyectu de la Conseyería de Cultura, Política Llingüística y Turismu fechu en collaboración colos Conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies.

Escena en Rede busca crear un espaciu d’alcuentru profesional y comercial pa compañíes y profesionales asturianos, buscando facilitar la comunicación, cooperación y intercambéu ente artistes, programadores y instituciones de la rexón; y dinamizar el sector, xenerando espacios pal debate y la reflexón y potenciando estilos y llinguaxes nuevos de creación.

El programa de la Muestra d’Artes Escéniques va incluyir la exhibición d’a lo menos 12 espectáculos en dellos espacios interiores y esteriores de la Llaboral, amás de presentaciones a profesionales, la creación d’un espaciu de networking y una xornada formativa profesional.

Güei ábrese la convocatoria pa la escoyeta d’obres de formatos, estilos y públicu oxetivu variaos que van programase nesta muestra, onde van tener sitiu’l teatru, la danza, el circu, la maxa y el teatru d’oxetos y títeres. Cada compañía y profesional va poder presentar namás un espectáculu, con una duración mínima de 15 minutos y un máximu de dos hores, qu’ha tar incluyíu nel Catálogu de l’Actividá Escénica asturiana de calter profesional. La Sociedá Pública de Xestión y Promoción Turística y Cultural del Principáu va pagar un porcentaxe d’hasta’l 70 % del caché de la compañía, nun superando en nengún casu los 2.000 euros más IVA por proyectu.

Pueden consultase los detalles de la convocatoria d’escoyeta d’espectáculos n’asturiesculturaenrede.es. La documentación requerío ha presentase esclusivamente al traviés de https://panel.asturiesculturaenrede.es dende güei y hasta’l 20 de marzu a les 12 hores.

Pa les presentaciones y alcuentru con programadores ha rellenase a partir del 1 d’abril un formulariu disponible na web asturiesculturaenrede.es.