Esta cita nueva va ofrecer el sábadu 26 en Llanera un programa d’actividaes gratuites empobinaes al públicu d’ente 16 y 35 años

Una feria d’asociaciones y empreses qu’usen la llingua asturiana na so actividá, talleres y conciertos componen el cartel d’esta primer edición

El Gobiernu d’Asturias suma un recursu nuevu p’averar la llingua asturiana al públicu más mozo. Seronda Moza naz como una cita n’asturianu onde los más xóvenes pueden atopar una ufierta cultural y d’ociu desarrollada n’asturianu y gratuita. La primer edición de Seronda Moza va celebrase esti sábadu 26 de payares nel IES de Posada, en Llanera.

El programa d’actividaes, diseñáu dende la Conseyería de Cultura, Política Llingüística y Turismu, va ufiertar a lo llargo de tola xornada un mercáu cultural y d’asociaciones onde van participar empreses y entidaes que desenvuelven la so actividá n’asturianu. Amás, van facese dellos talleres y la ufierta musical va incluyir una jam session coral p’adaptar dos temes tradicionales n’asturianu y un conciertu de Llevólu’l Sumiciu.

Tola programación ye de baldre, pero la participación nos talleres precisa la inscripción previa nel corréu electrónicu serondamoza@gmail.com. Nun ye menester cuntar con conocimientos d’asturianu pa participar en cualquiera de les actividaes que se van llevar a cabu.

El programa de talleres previstos a lo llargo de la mañana van tratar asuntos tan variaos como la cocina, l’actividá física, la creación de complementos, la composición d’un rap o la ellaboración d’un cosplay al traviés del reciclaxe de dellos elementos.