Quod Erat Demonstrandum (QED) va axuntar a autores del Principáu con otros llegaos de Galicia, País Vascu y Francia

Aurélia Lassaque, Bernardo Atxaga y Olga Novo van participar na programación que se va desenvolver hasta final d'anguaño

Quod Erat Demonstrandum (QED) ye'l nome del nuevu ciclu poéticu impulsáu pola Conseyería de Cultura, Política Llingüística y Turismu pa promocionar y dar voz a los poetes en llingua asturiana dientro y fuera del Principáu. El ciclu va axuntar en dellos alcuentros a poetes asturianos con autores de fuera que van ser traducíos a la llingua asturiana pa la ocasión. Esos primeros alcuentros van desenvolvese d'equí a final d'añu nel Salón d'Actos de la Biblioteca d'Asturies Ramón Pérez d'Ayala d'Uviéu.

El primeru de los alcuentros del QED va celebrase esti vienres 21 d'ochobre y va axuntar a Xaime Martínez y Aurélia Lassaque, amás d'una selección de poesía tradicional asturiana al cargu de Xosé Antón Ambás. Nel mes de payares, el vienres 25, va ser la vez de ver y escuchar xuntes a María García, Marta Mori y Olga Novo. Finalmente, nel mes d'avientu, el vienres 16, van ser Nacho Vegas, Xuan Bello y Bernardo Atxaga quien llean los sos poemes.

QED quier promover l'intercambiu d'esperiencies poétiques al traviés del diálogu d'autores n'asturianu con otros de fuera que caltienen estilos asemeyaos y coherentes cola obra de los creadores asturianos. El ciclu, entamáu pola Asociación Cultural Mezá col apoyu de la Dirección Xeneral de Política Llingüística, naz amás cola vocación de ser un puntu d'alcuentru pa los escritores de la rexón qu’apueste pola calidá lliteraria y promueva la diversidá xeneracional y d'estilos.

El nome del nuevu ciclu poéticu, coordináu pol escritor Miguel Rodríguez Monteavaro, vien de la llocución matemática llatina que podría traducise “como queda demostrao”, una alusión directa a la necesidá de sofitar y favorecer la profesionalización del exerciciu de la creación poética.