DÍA EUROPÉU DE LES LLINGÜES

Cada 26 de setiembre celebramos el Día Européu de les Llingües, una iniciativa del Conseyu d’Europa que nació nel 2001, a lo llargo del Añu Européu de les Llingües, entamáu xunto a la Unión Europea. L’éxitu d’aquella esperiencia llevó al Conseyu d’Europa a convertir esta fecha nuna celebración anual dedicada a poner en valor la diversidá llingüística y cultural del continente.

Asturianu y eonaviegu: llingües d’Asturies, llingües d’Europa

La Conseyería de Cultura, Política Llingüística y Deporte, celebra’l Día Européu de les Llingües, con un actu conmemorativu que va tener llugar el 22 de setiembre a les 19:00 hores, nel Plató de Llaboral Centru d’Arte, en Xixón.

L’alcuentru propón una celebración de la diversidá llingüística y cultural d’Europa al traviés del diálogu, la lliteratura y la música. El programa va incluyir una mesa redonda alredor de la Carta Europea de les Llingües y la diversidá llingüística europea, cola participación del eurodiputáu Jonás Fernández y del subdirector de Política Llingüística, Nicolás Bartolomé, y una intervención poética de Sofía Castañón.

La xornada va completase con una actuación musical curtia al cargu d’un cuartetu de cuerda de la OSPA yun brinde final con sidra de gala.

DÍA EUROPEO DAS LLINGUAS

Cada 26 de setembre celebramos el Día Europeo das Llinguas, úa iniciativa del Conseyo d’Europa que nacéu nel 2001, durante el Ano Europeo das Llinguas, organizao xunto á Unión Europea. El éxito d’aquella esperiencia levóu al Conseyo d’Europa a convertir esta fecha núa celebración anual dedicada a poñer en valor a diversidá llingüística y cultural del continente.

Asturiano y eonaviego: llinguas d’Asturias, llinguas d’Europa

A Conseyeiría de Cultura, Política Llingüística y Deporte celebra el Día Europeo das Llinguas con un acto conmemorativo, que vai ferse el 22 de setembre, ás 19.00 horas, nel Estudio de Llaboral Centro d’Arte, en Xixón.

El encontro propón úa celebración da diversidá llingüística y cultural d’Europa al través del diálogo, a lliteratura y a música. El programa vai incluír úa mesa redonda alredor da Carta Europea das Llinguas y a diversidá llingüística europea, cua participación del eurodiputao Jonás Fernández y del subdirector de Política Llingüística, Nicolás Bartolomé y úa intervención poética de Sofía Castañón.

A xornada ha a completarse con úa actuación musical curtia al cargo d’un cuarteto de corda da OSPA y un brinde final con sidra de gala.