Cellero y los sos collacios echen el tiempu en chigre recordando vieyes glories, esbabayando y tomando pintes. Pero dende’l 8 de marzu dalgo cambia nes sos vides: les muyeres, qu’enantes quedaben en casa, échense al monte. Guiaes por Andrea, la nieta Manolín, muyeres y pensionistes de la parroquia van armala, poniendo en dificultaes a les autoridaes y al poder financieru.

Ambientáu nos alredores de la fuelga feminista del 8 de marzu del 2018, La talla 38 o fuera los grilletes de les fañagüetes ye un intentu d’espeyar, partiendo de la comedia popular y del monólogu asturianu, les esmoliciones y lluches de los movimientos sociales, en concreto, el feminista y el de pensionistes. Fáense delles referencies a lo que representó’l movimientu del 15-M, tamién al timu de les preferentes que tanto afectó a les persones mayores y a les rellaciones familiares en xeneral.