Igual que’l día a día del mundu d’anguaño, el protagonista de la obra, Ebenezer Scrooge, perdió la ilusión depués de sufrir muncho a lo llargo de la vida. Pa Ebenezer too son quexes y molesties y lo único que tien claro ye que nun pue ver la navidá. Pa él, la navidá son babayaes.

Atopámonos énte una hestoria entrañable que treslládanos dos sieglos p’atrás, en Londres. Siete años depués de la muerte del antiguu sociu, na nueche de Nuechebona, al protagonista, Ebenezer Scrooge, l’home más repunante, testerón y atuñáu de tola ciudá, van visitalu trés espíritus: Pasáu, Presente y Futuru. ¿Sedrán quién estes visites a camudar la forma de ver la vida del Sr. Scrooge?